Istiqbolli xalqaro tadqiqotlar instituti (IXTI) Finlyandiya xalqaro munosabatlar instituti (FIIA) vakili doktor Kristiina Silvan bilan uchrashuv o‘tkazdi. Tadbir xalqaro munosabatlardagi joriy tendensiyalar, mintaqaviy xavfsizlik dinamikasi hamda tadqiqot muassasalari o‘rtasidagi ekspert va ilmiy hamkorlikni mustahkamlash istiqbollari yuzasidan fikr almashish uchun imkoniyat yaratdi.

Muloqot chog‘ida Markaziy Osiyoning xalqaro siyosatdagi o‘rni o‘zgarib borayotgani, Shimoliy Yevropa mamlakatlarining tashqi siyosiy ustuvorliklari va global geosiyosiy o‘zgarishlar sharoitida mintaqalararo muloqot ahamiyatining ortib borayotgani bilan bog‘liq masalalar muhokama qilindi. IXTI va Finlyandiya tahliliy muassasalari o‘rtasidagi hamkorlikni qo‘shma tadqiqotlar, ekspert maslahatlashuvlari, akademik almashinuvlar va kelgusi tadbirlarda ishtirok etish orqali rivojlantirish imkoniyatlariga alohida e’tibor qaratildi.

Uchrashuv yakunida tomonlar kasbiy muloqotni davom ettirishdan va hamkorlikning amaliy yo‘nalishlarini izlashdan o‘zaro manfaatdor ekanliklarini bildirdilar. IXTI xalqaro ekspertlar ishtirokini kengaytirishga hamda Yevropa va undan tashqaridagi yetakchi tadqiqot markazlari bilan aloqalarni mustahkamlashga sodiqligini yana bir bor tasdiqladi.