IXTIning Amerika tadqiqotlari markazi katta ilmiy xodimi Fazliddin Djamalov KIMEP universiteti tomonidan tashkillashtirilgan “Yevropa Ittifoqi, Rossiya va Xitoy kontekstida Markaziy Osiyo mintaqaviyligi” konferensiyasida mazmunli ma’ruza qildi. Uning “Odatiy aloqalardan tashqariga chiqish: Markaziy Osiyo mamlakatlari yangi hamkorlik munosabatlarini o‘rnatmoqda” deb nomlangan taqdimoti norezident ilmiy xodim Aleksandr Shrayer va stajyor-tadqiqotchi Malika Хakimova bilan hammualliflikda yozilgan tadqiqot ishiga asoslangan.

2024-yil 14-15-noyabr kunlari Qozog‘istonning Olmota shahrida bo‘lib o‘tgan konferensiya Jean Monnet “Yevropa Ittifoqi va Markaziy Osiyo munosabatlari: mintaqaviy integratsiya, hamkorlik va kooperatsiyaning yangi ufqlari (EUCA-RIPC)” loyihasi doirasida tashkil etildi. Tadbir mintaqaviy integratsiya muammolari va global kuchlarning Markaziy Osiyo geosiyosatiga ta’siri bilan bog‘liq eng muhim mavzularni muhokama qilish uchun akademik doiralar, tahliliy markazlar va siyosiy doiralardan ekspertlarni to‘pladi.

Djamalov janoblarining taqdimoti Markaziy Osiyoda mintaqaviy hamkorlikning rivojlanish dinamikasiga bag‘ishlandi va an’anaviy ittifoqlardan tashqariga chiquvchi hamkorlik munosabatlarini diversifikatsiya qilishning strategik zarurligi ta’kidlandi. U Markaziy Osiyo davlatlari mintaqaviy barqarorlik va iqtisodiy rivojlanishni mustahkamlash uchun yangi diplomatik, iqtisodiy va infratuzilmaviy aloqalardan qanday foydalanayotganini tahlil qildi.

Ushbu birgalikdagi tadqiqot an’anaviy geosiyosiy ittifoqlardan tashqari ishonchli hamkorlik munosabatlarini o‘rnatishda mintaqaning salohiyatini ta’kidlab, Markaziy Osiyo integratsiyasini muhokama qilishga sezilarli hissa qo‘shadi. Tadqiqot natijalari global raqobatning kuchayishi va mintaqaviy o‘zgarishlar bilan tavsiflanuvchi davrda Markaziy Osiyo diplomatiyasining o‘zgaruvchan manzarasini kengroq tushunishga yordam beradi.