Istiqbolli xalqaro tadqiqotlar instituti (IXTI) mintaqada ilmiy hamkorlikni rivojlantirish va suv diplomatiyasini ilgari surish maqsadida Xalqaro suv kotibiyati (XSK) vakillarini qabul qildi. Uchrashuv Markaziy Osiyo va Afg‘onistonda suv siyosati sohasidagi hamkorlik imkoniyatlarini o‘rganish, ilmiy tadqiqotlar olib borish va suv bilan bog‘liq muammolar yuzasidan muloqotni mustahkamlash uchun maydon vazifasini bajardi.
Delegatsiya tarkibiga Markaziy Osiyo bo‘yicha loyiha menejeri Olivye Normand va Markaziy Osiyodagi yoshlar sektori bo‘yicha loyiha menejeri Sara Skardavilli kirdi. IXTI tomonidan direktor o‘rinbosari Shaxboz Axmedov hamda yetakchi ilmiy xodimlar Islomxon Gafarov, Fazliddin Djamalov va Odilbek Manabov ishtirok etdi.
Direktor o‘rinbosari Axmedov o‘z kirish so‘zida hurmatli mehmanlarga tashrif uchun minnatdorchilik bildirib, bunday uchrashuvlarning mintaqadagi dolzarb suv muammolarini hal etishdagi ahamiyatini ta’kidladi. U Markaziy Osiyo va Afg‘onistonda suv resurslarini tartibga solish va ularni barqaror boshqarishga qaratilgan loyihalarni ilgari surishda hamkorlikning muhimligini alohida qayd etdi. Shuningdek, u JIDUning suv resurslarini barqaror boshqarishni targ‘ib qilishdagi yutuqlarini, xususan, Toshkent irrigatsiya va qishloq xo‘jaligini mexanizatsiyalash muhandislari instituti (TIQXMMI) bilan hamkorlikda suv diplomatiyasi bo‘yicha magistrlik dasturini ishga tushirganini ta’kidladi. Ushbu dastur suv resurslarini boshqarish va suv bilan bog‘liq muammolarni samarali hal qilish sohasida kelajak yetakchilarini tayyorlashga qaratilgan.
Olivye Norman Jahon banki va Shveysariya taraqqiyot va hamkorlik agentligi kabi xalqaro tashkilotlar bilan ishlash tajribasi haqida so‘zladi hamda suv diplomatiyasi va ta’lim sohasidagi istiqbolli tashabbuslar to‘g‘risida ma’lumot berdi. U toza suvdan foydalanishni yaxshilash va ekologik muammolarni hal qilish uchun mintaqaviy hamkorlikni rivojlantirishga alohida e’tibor qaratdi.
Uchrashuvning asosiy yo‘nalishi Markaziy Osiyo mamlakatlari va Afg‘oniston o‘rtasidagi hamkorlikni mustahkamlash uchun konferensiyalar va salohiyatni oshirish loyihalarini tashkil etish bo‘yicha hamkorlik qilish bo‘ldi. Muhokamalar davomida, shuningdek, Farg‘ona vodiysida toza suvdan foydalanishni yaxshilashga qaratilgan joriy loyihalar, shu jumladan tashabbuslar, suv resurslari va atrof-muhitni boshqarish bilan bog‘liq qarorlarni qabul qilish jarayonlariga yoshlarni jalb etish muhimligi ko‘rib chiqildi.
Uchrashuv bilim almashish tadbirlarini o‘tkazish bo‘yicha kelishuv bilan yakunlandi. Delegatsiya a’zolari mintaqada suv diplomatiyasi sohasidagi tushunchalarni chuqurlashtirish va yechimlar topishga yordam beradigan kelajakdagi hamkorlik, tadqiqot tashabbuslari va konferensiyalar xususida ijobiy fikr bildirdilar.
