12-aprel kuni Abbos Boboxonov kuratorligidagi IXTI Xitoy tadqiqotlari klubi “Frontier Talks” turkumidan navbatdagi seminar o‘tkazdi. Muhokamada Germaniyaning Sharqiy Yevropa va xalqaro tadqiqotlar markazi (ZOiS) ilmiy xodimi, Valentin Kryusmann ma’ruza qildi. Tadbir Xitoyning tashqi siyosati va uning Markaziy Osiyodagi strategik manfaatlariga bag‘ishlandi.

Anjumanda Xitoyning Markaziy Osiyo bilan o‘zaro aloqalarining iqtisodiy asoslari, xususan, energetika, tabiiy resurslar, infratuzilma va yashil rivojlanish sohalaridagi hamkorligi tahlil qilindi. Mintaqa Xitoyning energetik xavfsizligi va uzoq muddatli sanoat o‘sishi uchun doimiy ahamiyat kasb etishi, ayni paytda, assimetrik o‘zaro bog‘liqlik, qarz majburiyatlarining ortishi hamda samaraliroq moliyaviy boshqaruv zarurati kabi masalalarni yuzaga keltirayotgani ta’kidlandi.

Shuningdek, muhokamada “Bir makon, bir yo‘l” kabi yirik tashabbuslarning kengayishiga qaramay, mintaqadagi madaniy, ijtimoiy va siyosiy tafovutlar keng jamoatchilik bilan chuqurroq hamkorlikni cheklab qo‘yayotgani sababli Xitoyning “yumshoq kuchi” ta’siri hamon cheklanganicha qolayotgani qayd etildi.

Uchrashuv so‘ngida Markaziy Osiyoning ortib borayotgan xalqaro ahamiyati hamda Xitoy bilan hamkorlikda strategik, shaffof va diversifikatsiyalashgan yondashuvni saqlab qolish muhimligi haqida atroflicha fikr yuritildi. “Frontier Talks” anjumani Xitoyning mintaqadagi o‘zgaruvchan rolini akademik darajada muhokama qilish uchun muhim platforma vazifasini o‘tadi hamda o‘zaro bog‘liqlik, xavfsizlik va mintaqaviy rivojlanish kesishuvidagi masalalar yuzasidan mutaxassislarning doimiy muloqoti qimmatli ekanini ko‘rsatib berdi.