24-aprel kuni IXTIda “Frontier Talks” turkumining navbatdagi anjumani “Markaziy Osiyo tadqiqotlarining konseptual muammosi” mavzusida bo‘lib o‘tdi. Unda “Bilim Karvoni” nodavlat ilmiy-tadqiqot instituti direktori, siyosiy fanlar nomzodi doktor Farhod Tolipov ma’ruza qildi.

Doktor Tolipov o‘z ma’ruzasida Markaziy Osiyoni o‘rganishdagi konseptual va metodologik qiyinchiliklarga to‘xtaldi. Uning qayd etishicha, mintaqa ko‘pincha realizm, liberalizm va konstruktivizm kabi xalqaro munosabatlar nazariyasining asosiy maktablari nuqtayi nazaridan tahlil qilinadi. Shu bilan birga, u mavjud yondashuvlarning aksariyati biryoqlama bo‘lib, asosan ko‘zga ko‘ringan siyosiy va geosiyosiy omillarga tayanayotganini, bu esa mintaqa taraqqiyotini soddalashtirilgan tarzda tushunishga olib kelishi mumkinligini ta’kidladi.

Muhokamaning asosiy qismi doktor Tolipov ta’biri bilan aytganda, milliy-mintaqaviy dualizmga qaratildi. U ushbu dualizmning bir qancha o‘lchovlarini, jumladan, geografiya, daryolarning yuqori va quyi oqimi mamlakatlari o‘rtasidagi munosabatlar, ko‘chmanchilik va o‘troqlik an’analari, turkiy-fors madaniy ta’siri, Ostona-Toshkent dinamikasi, siyosiy tizimlar hamda ichki va tashqi integratsiyani alohida ajratib ko‘rsatdi. Ma’ruzachining fikricha, bu ikkiliklar Markaziy Osiyo ham mavjud, ham g‘oyalar, siyosat va institutlar vositasida shakllanishda davom etayotgan murakkab bir mintaqa ekanini namoyon etadi.

Seminar Markaziy Osiyo tadqiqotlarining kelajagi va mintaqani anglashda yanada mukammal konseptual asoslarga ehtiyoj borligi yuzasidan fikr almashish bilan yakunlandi.