3-sentyabr kuni Jahon iqtisodiyoti va diplomatiya universitetida (JIDU) Istiqbolli xalqaro tadqiqotlar instituti (IXTI) bilan hamkorlikda “Barqaror rivojlanish, tibbiyot, geosiyosat” mavzusida xalqaro davra suhbati bo‘lib o‘tdi. Forum turli mamlakatlar va faoliyat sohalaridan kelgan mutaxassislarni birlashtirgan holda siyosiy, akademik va ekspert doiralari vakillari o‘rtasidagi mazmunli muloqot uchun nufuzli maydonga aylandi.

Tadbir ishtirokchilariga O‘zbekiston Respublikasi Oliy Majlisi Senati Raisining birinchi o‘rinbosari, JIDU rektori Sodiq Safoyev qutlov so‘zi bilan murojaat qildi. U barqaror rivojlanish, sog‘liqni saqlash va geosiyosiy dinamika muammolari bir-biri bilan chambarchas bog‘liq bo‘lgan va xalqaro ekspertlar hamjamiyatining birgalikdagi sa’y-harakatlarini talab qiladigan global jarayonlarni tahlil qilishda kompleks fanlararo yondashuvning zarurati tobora ortib borayotganini ta’kidladi.

Muhokamada taniqli xalqaro arboblar: Armaniston Respublikasining to‘rtinchi prezidenti Armen Sarkisyan va Singapur Milliy universiteti Xalqaro tibbiyot kengashi raisi, Favqulodda va muxtor elchi, professor Kishore Mahbubani ishtirok etdi. Shuningdek, RKLinks bosh direktori Raja Kamol ham so‘zga chiqdi. Bundan tashqari, muhokamaga davlat organlari va jamoat boshqaruvi, xalqaro tashkilotlar, O‘zbekistonda akkreditatsiyadan o‘tgan diplomatik korpus vakillari, hamda mahalliy va xorijiy ilmiy hamjamiyatning yetakchi olimlari va ekspertlari qo‘shildi.

Davra suhbati ishtirokchilari zamonaviy dunyo o‘zgarishlari bilan bog‘liq keng ko‘lamli masalalarni muhokama qildilar. Global jarayonlarda Osiyoning o‘sib borayotgan roli, xalqaro maydonda kuchlar muvozanatining o‘zgarishi, shuningdek, mavjud dunyo tartibiga bo‘lgan tahdidlarga alohida e’tibor qaratildi. Iqtisodiy va texnologik modellar raqobati, qadriyatlar tizimidagi farqlar, hamda yangi tarixiy davr sharoitida Sharq va G‘arbning konstruktiv o‘zaro munosabatlari istiqbollari muhokamaning asosiy mavzulariga aylandi.

Davra suhbati yakunlari fanlararo muloqotni mustahkamlashga hissa qo‘shdi va iqtisodiyot, siyosat va sog‘liqni saqlash chorrahasida turgan eng murakkab muammolarga yechim topish bo‘yicha konstruktiv takliflar ishlab chiqish imkonini berdi.