2024-yil 6-7-may kunlari Istiqbolli xalqaro tadqiqotlar instituti (IXTI) Rossiya xalq xo‘jaligi va davlat boshqaruvi akademiyasi Ijtimoiy fanlar instituti bilan hamkorlikda “Zamonaviy Markaziy Osiyoda milliy o‘ziga xoslik: ramzlar, nutqlar, rivoyatlar” mavzusida xalqaro konferensiya tashkil qildi.

Konferensiyaning ochilishida Nazariy va amaliy siyosatshunoslik ilmiy-tadqiqot markazi direktori Vladimir Malaxov, tarix fanlari nomzodi Ilya Jenin, Jahon iqtisodiyoti va diplomatiya universiteti birinchi prorektori Akram Umarov, Ilmiy ishlar va innovatsiyalar bo‘yicha prorektor Gulnoza Ismailova va IXTI direktori Sherzod Abdullayev kirish so‘zi bilan nutq qildilar. 

Konferensiyaning birinchi kunida quyidagi mavzular muhokama qilindi: “Qozoq o‘ziga xosligi va davlat qurilishida islomning o‘rni”, “Postsovet davridagi Markaziy Osiyoda tarixiy xotira rejimlari”, shuningdek, “1991 yildan keyin O‘zbekiston milliy o‘ziga xosligining shakllanishi”.

Anjumanning ikkinchi kunida “Tarixiy rivoyatlardagi eski va yangi qahramonlar (Qurmanjon Datka va Mixail Frunze misolida”), “Rossiyaning “yangi media”sida sovet loyihalarining raqamli izlari”, “Tarixni milliylashtirish strategiyasi” kabi mavzular muhokamasi bo‘lib o‘tdi. 

Umuman olganda, konferensiya zamonaviy Markaziy Osiyo kontekstida milliy o‘ziga xoslikning keng tahlilini taqdim etdi va mintaqadagi ijtimoiy rivojlanish dinamikasini hamda madaniyatlararo o‘zaro muloqotni tushunish uchun keyingi tadqiqotlar muhimligini ta’kidladi.