Istiqbolli xalqaro tadqiqotlar instituti Osiyo-Tinch okeani tadqiqotlari markazi rahbari Abbos Boboxonov joriy yilning 6-9 iyun kunlari Qozog‘istonning Olmaota shahridagi Turon universitetda bo‘lib o‘tgan Markaziy Yevroosiyo tadqiqotlari jamiyatining (Central Eurasian Studies Society, CESS) yillik konferensiyasida ishtirok etdi.
Konferensiyada dunyoning yetakchi ilmiy muassasalaridan 400 dan ortiq ekspertlar ishtirok etib, ularning ma’ruzalari antropologiya, tarix, madaniyatshunoslik, gendershunoslik, tadbirkorlik, iqtisodiyot va moliya, ta’lim, tilshunoslik, sotsiologiya, siyosatshunoslik, xalqaro munosabatlar va huquq sohalariga oid mavzularni qamrab oldi.
Abbos Boboxonov “Raqamli Xitoy va Markaziy Osiyo” panelida “Xitoyning texnologik maqsadlari va ularning O‘zbekiston sharoitida moslashuvi” mavzusida ma’ruza qildi. U o‘z nutqida Xitoyning ilg‘or texnologiyalarini O‘zbekiston iqtisodiyotiga integratsiya qilish muhimligini ta’kidladi. Mutaxassis Xitoy sun’iy intellekt, Big Data (katta ma’lumotlar) va 5G texnologiyalari sohasida jahon yetakchisi ekanligini va bu yutuqlar O‘zbekistonning raqamli transformatsiyasiga salmoqli hissa qo‘shishi mumkinligini ta’kidladi. Shuningdek, u mahalliy xususiyatlar va ehtiyojlarni hisobga olgan holda ushbu texnologiyalarni moslashtirish strategiyalarini ishlab chiqish zarurligini qo‘shib o‘tdi. Abbos Boboxonov o‘z nutqi so‘nggida O‘zbekiston va Xitoy texnologik kompaniyalari o‘rtasida barqaror iqtisodiy o‘sishni ta’minlaydigan va mintaqada hayot sifatini yaxshilashga yordam beradigan innovatsion yechimlarni birgalikda ishlab chiqish uchun hamkorlikni kengaytirishga chaqirdi.
Tadbir doirasida Qozog‘iston ilmiy-tadqiqot institutlari olimlari va mutaxassislari bilan ham qator ikki tomonlama uchrashuvlar o‘tkazildi va kelgusidagi hamkorlik uchun mustahkam poydevor yaratildi. Konferensiya dunyoning turli burchaklaridan kelgan yetakchi tadqiqotchilar va ekspertlar o‘rtasida fikr almashish, aloqa o‘rnatish va hamkorlik qilish uchun muhim platformaga aylandi. Tadbir ishtirokchilari dunyo oldida turgan dolzarb muammolarni muhokama qilish va ularni yengish uchun innovatsion yechimlarni taklif qilish uchun noyob imkoniyatga ega bo‘ldilar.
Ma’lumot uchun: Markaziy Yevroosiyo tadqiqotlari jamiyatining (Central Eurasian Studies Society, CESS) yillik konferensiyasi Markaziy Yevroosiyo muammolariga bag‘ishlangan muhim ilmiy tadbirdir. Ushbu tadbir mintaqa tarixi, madaniyati, siyosati, iqtisodiyoti va jamiyatining turli jihatlarini muhokama qilish uchun turli mamlakatlardan tadqiqotchilar, olimlar va mutaxassislarni birlashtiradi. Konferentsiya har yili dunyoning turli universitetlari va tadqiqot markazlarida o‘tkaziladi va ishtirokchilarga turli ilmiy va madaniy kelib chiqishini his qilish imkonini beradi. Konferentsiya materiallari ko‘pincha ixtisoslashtirilgan jurnal va to‘plamlarda nashr etiladi, bu esa yangi bilim va g‘oyalarni tarqatishga yordam beradi.
