IXTI Barqaror rivojlanish markazi rahbari Shaxboz Axmedov 8-9-dekabr kunlari Budapeshtda ilk bor o‘tkazilgan Turkiy-G‘arbiy geosiyosiy muloqotda ishtirok etib, Markaziy Osiyoning toza energiyaga o‘tishdagi strategik roli va muhim minerallar uchun global raqobat mavzularidagi yuqori darajali muhokamalarga o‘z hissasini qo‘shdi. Dunay institutining Turkiy-G‘arbiy aloqalar tashabbusi doirasida tashkil etilgan ushbu muloqot siyosatchilar, ekspertlar va olimlarni bir joyga jamlab, turkiy dunyoning global siyosat, iqtisodiyot va aloqalardagi o‘zgaruvchan o‘rnini tahlil qilishga qaratildi.

Shaxboz Axmedov Yevropa Ittifoqi – Turkiy davlatlar tashkiloti (TDT) hamkorlik asoslarini shakllantirishga bag‘ishlangan sessiyada ma’ruzachi sifatida qatnashib, Markaziy Osiyoning barqaror rivojlanish istiqbollarini taqdim etdi. U o‘z nutqida Markaziy Osiyo davlatlari o‘z pozitsiyalarini yaxshiroq muvofiqlashtirishi, umumiy ustuvor yo‘nalishlarni belgilashi va rivojlanayotgan hamkorlik faqat xomashyo eksporti bilan cheklanib qolmay, balki mintaqada qo‘shimcha qiymat, sanoatlashtirish va sifatli ish o‘rinlari yaratilishini ta’minlashi zarurligini alohida ta’kidladi.

Muloqot davomida ishtirokchilar Markaziy Osiyoning uran, mis, litiy, kobalt va nodir yer elementlari zaxiralari toza energiya texnologiyalari va yuqori texnologiyali ta’minot zanjirlari uchun tobora muhim ahamiyat kasb etayotganini ta’kidladilar. Shu bilan birga, muhokamalarda ushbu salohiyatni ro‘yobga chiqarish uchun geologik ma’lumotlardagi kamchiliklarni bartaraf etish, infratuzilmani modernizatsiya qilish va suvdan foydalanish, chiqindilar xavfsizligi, yerning buzilishi hamda mahalliy aholining farovonligi bilan bog‘liq xatarlarni boshqarish uchun kuchli ekologik, ijtimoiy va boshqaruv (ESG) standartlarini joriy etish zarurligi qayd etildi.