Toshkent, Oʻzbekiston – 12-avgust 2024. Hozirda Jahon iqtisodiyoti va diplomatiya universitetida (JIDU) joriy yilning 5-avgust kuni boshlangan Markaziy Osiyo universitetlari professor-oʻqituvchilari uchun suv diplomatiyasi boʻyicha oʻquv kursining ikkinchi haftasi boʻlib oʻtmoqda. Kurs Toshkent irrigatsiya va qishloq xo‘jaligini mexanizatsiyalash muhandislari instituti, Qirg‘iziston Respublikasi Tashqi ishlar vazirligi Diplomatik akademiyasi va Xalqaro suv xo‘jaligi instituti (International Water Management Institute, IWMI) bilan hamkorlikda Erasmus+ HWCA loyihasi doirasida tashkil etilgan. Shuningdek, ushbu dasturda JIDU qoshidagi Istiqbolli xalqaro tadqiqotlar instituti (IXTI) direktori oʻrinbosari janob Shaxboz Axmedov va IXTI Barqaror rivojlanish markazi ilmiy xodimi Odilbek Manabov ham ishtirok etishmoqda.

JIDUdagi kurs haftaligini hamkor tashkilotlarning yuqori martabali vakillari bilan birgalikda o‘quv ishlari bo‘yicha birinchi prorektor Akram Umarov ochib berdi. U o‘zining kirish so‘zida suv diplomatiyasining zamonaviy geosiyosiy landshaftdagi muhim rolini ta’kidladi va ishtirokchilarga muvaffaqiyatlar tiladi.

Bundan tashqari, hozirda Shveytsariya hukumatining Blue Peace Central Asia tashabbusi bilan yosh tadqiqotchilar uchun suv diplomatiyasi bo‘yicha yozgi maktab o‘tkazilmoqda. Ushbu dastur intiluvchan mutaxassislarga suv resurslarini boshqarish va diplomatiya sohalarida ham nazariy bilim, ham amaliy tajriba bilan ta’minlash uchun mo‘ljallangan. Kompleks o‘quv dasturi yetakchi mutaxassislarning ma’ruzalari, amaliy seminarlari va muhim suv havzalariga tashriflarni o‘z ichiga oladi. Bunday yondashuv ishtirokchilarga sohadagi muammolar va yechimlarni chuqur tushunish imkonini beradi.

Dastur yakuniga qadar Markaziy Osiyo universitetlarining professor-o‘qituvchilari va yosh tadqiqotchilari dolzarb suv muammolarini hal etishga hamda siyosatni ishlab chiqish va mintaqaviy hamkorlikka hissa qo‘shishga tayyor bo‘lishi kutilmoqda.