14-dekabr kuni IXTI direktori, professor Sherzod Abdullayev, katta ilmiy xodim Islomxon Gafarov va ilmiy xodim Mushtariy Usmonova Qozog‘iston Respublikasi Fanlar akademiyasining R.B. Sulaymonov nomidagi Sharqshunoslik instituti vakillari bilan uchrashdi.

Uchrashuv jarayonida Xitoydagi zamonaviy jarayonlar, shuningdek, Xitoyning tashqi va iqtisodiy siyosatining Markaziy Osiyo mintaqasiga ta’siri bo‘yicha hamkorlik va qo‘shma tadqiqotlar o‘tkazish masalalari muhokama qilindi. Xitoyning rivojlanish dinamikasi va uning qo‘shni davlatlar bilan o‘zaro munosabatlarini chuqurroq tahlil qilish imkonini beradigan tajriba va tadqiqot uslublarini almashishga alohida e’tibor qaratildi.

Tomonlar Sharqiy Osiyodagi mintaqaviy geosiyosat va ijtimoiy-iqtisodiy jarayonlarni o‘rganishga qaratilgan qo‘shma loyihalarni yaratish, ilmiy nashrlarni tashkil etish va ekspert seminarlarini o‘tkazishga o‘zaro qiziqish bildirdilar. Tadqiqot markazlarining sa’y-harakatlarini birlashtirish akademik hamkorlik uchun mustahkam poydevor yaratishi va xalqaro maydonda har ikki tomonning ilmiy mavqeyini oshirishi ta’kidlandi.

Uchrashuv yakunida ishtirokchilar O‘zbekiston va Qozog‘iston o‘rtasidagi akademik salohiyatni rivojlantirish va ilmiy hamkorlikni mustahkamlashga xizmat qiladigan muntazam aloqalarni qo‘llab-quvvatlash, ma’lumot almashish va tahliliy materiallarni birgalikda tayyorlash to‘g‘risida kelishib oldilar.