16-yanvar kuni Jahon iqtisodiyoti va diplomatiya universitetida “O‘zbekistonning ichki modernizatsiyasi va tashqi siyosiy salohiyati: iqtisodiy o‘zgarishlar, inson kapitalini rivojlantirish va xalqaro mavqeni mustahkamlash” mavzusida davra suhbati bo‘lib o‘tdi. Tadbir O‘zbekiston Respublikasi Prezidenti Shavkat Mirziyoyevning 2025-yil 26-dekabrda Oliy Majlis va O‘zbekiston xalqiga yo‘llagan Murojaatnomasida mamlakatni ichki modernizatsiya qilish uning tashqi siyosiy subyektligining asosiy manbai sifatida belgilangan qoidalarni har tomonlama ekspertlik nuqtai nazaridan tahlil qilishga bag‘ishlandi. Davra suhbatini Jahon iqtisodiyoti va diplomatiya universiteti, Istiqbolli xalqaro tadqiqotlar instituti, Progressiv islohotlar markazi (PIM), O‘zbekiston Respublikasi Tashqi ishlar vazirligi huzuridagi Tashqi siyosiy tadqiqotlar markazi (TSTM) tashkil etdi.
Tadbirni ochib bergan O‘zbekiston Respublikasi Oliy Majlisi Senati Raisining birinchi o‘rinbosari, JIDU rektori Sodiq Safoyev, PIM direktori va hammuassisi Mirshohid Aslanov va TSTM direktori Sanjar ValiyevO‘zbekiston taraqqiyotining hozirgi bosqichi ichki islohotlar mantig‘idan faqat ijtimoiy-iqtisodiy jarayon sifatida emas, balki davlatning xalqaro mavqeini mustahkamlash vositasi sifatida qabul qilishga o‘tish bilan tavsiflanishini ta’kidladilar. Shu nuqtai nazardan, davra suhbati iqtisodiy o‘zgarishlar, inson kapitalini rivojlantirish, institutsional barqarorlik va ijtimoiy farovonlikni mamlakatning uzoq muddatli tashqi siyosiy resursiga qanday aylantirish mumkinligini muhokama qilish uchun ekspert maydoniga aylandi.
Birinchi sessiya O‘zbekistonning xalqaro muloqot maydoni, global va mintaqaviy jarayonlarning faol ishtirokchisi sifatidagi roli ortib borayotgani to‘g‘risidagi Prezident Murojaatnomasi g‘oyalari bilan bevosita bog‘liq bo‘ldi. Faol va muvozanatli tashqi siyosat yuritishning asosi sifatida davlatning institutsional samaradorligi, boshqaruvchanligi va strategik barqarorligi masalalari muhokama markazida turdi. Ishtirokchilar O‘zbekistonda yirik xalqaro tadbirlarning muvaffaqiyatli o‘tkazilishi va mamlakat diplomatik aloqalarining kengayishi davlat boshqaruvi sifati va tashqi siyosiy ishonch darajasi o‘rtasidagi to‘g‘ridan-to‘g‘ri bog‘liqlikni tasdiqlayotganini ta’kidladilar.
Ikkinchi sessiya Prezident Murojaatnomasida milliy qudratning asosiy omillaridan biri sifatida belgilangan modernizatsiyaning iqtisodiy jihatlariga bag‘ishlandi. Ekspertlar so‘nggi yillardagi makroiqtisodiy yutuqlar, jumladan, yalpi ichki mahsulotning o‘sishi, investitsiya muhitining yaxshilanishi va tadbirkorlikning rivojlanishi haqida so‘z yuritib, iqtisodiy barqarorlik tashqi siyosiy mustaqillikning moddiy asosini tashkil etishini ta’kidladilar. Muhokama chog‘ida raqobatbardosh iqtisodiyot O‘zbekistonning muzokaralar mavqeini mustahkamlashi va uning xalqaro harakat maydonini kengaytirishi qayd etildi.
Uchinchi sessiya davlatimiz rahbarining “Yangi O‘zbekiston” taraqqiyotining strategik resursi sifatida inson kapitali to‘g‘risidagi Murojaatnomasi qoidalarini mantiqiy davom ettirdi. Ta’lim, fan, ijtimoiy harakatchanlik va yoshlar ishtiroki masalalari muhokama markazida bo‘ldi. Ishtirokchilar inson va ijtimoiy kapitalga investitsiyalar nafaqat jamiyatning ichki barqarorligiga hissa qo‘shishini, balki mamlakatning ijobiy xalqaro imijini shakllantirib, uning “yumshoq kuch”i va global maydondagi jozibadorligini oshirishini ta’kidladilar.
Xulosa qilib aytganda, davra suhbati ishtirokchilari Prezident Murojaatnomasi ichki modernizatsiya va tashqi siyosatni yagona rivojlanish yo‘lining bir-birini to‘ldiruvchi elementlari sifatida ko‘rib chiqadigan yaxlit strategik asosni belgilab berganiga yakdil fikr bildirdilar. Ekspert muhokamalari o‘zgarayotgan jahon tizimi sharoitida O‘zbekistonning xalqaro mavqeini mustahkamlash bo‘yicha amaliy tavsiyalar ishlab chiqish maqsadida ilmiy-tadqiqot institutlari, davlat organlari va akademik hamjamiyat o‘rtasidagi tahliliy muloqotni yanada chuqurlashtirishning dolzarbligini tasdiqladi.
