IXTIda o‘tkazilgan ilmiy seminarda doktor Fariddin Sattarov ilmiy rahbarligida tayyorlangan Mohira Saidazimxo‘jayevaning “Fransiya tashqi siyosatidagi “yumshoq kuch”: Markaziy Osiyo yo‘nalishi” mavzusidagi nomzodlik dissertatsiyasi muhokama qilindi.

Seminar davomida taqrizchilar – professor Azamat Seitov va doktor Islomxon G‘aforov, shuningdek, IXTI Ilmiy kengashining boshqa a’zolari ishning nazariy-metodologik asoslari hamda amaliy xulosalari bo‘yicha o‘z fikr-mulohazalarini bildirdilar. Ishtirokchilar raqobatli xalqaro muhitda “yumshoq kuch” tushunchasini talqin qilish masalalariga, shuningdek, Fransiya tajribasini O‘zbekiston tashqi siyosiy amaliyotiga moslashtirish imkoniyatlariga alohida e’tibor qaratdilar.

Seminar ishtirokchilari muallifning madaniy diplomatiya masalalari bo‘yicha siyosatshunoslik maktabini rivojlantirishga qo‘shgan hissasini ta’kidlab, Markaziy Osiyo mintaqasida fransuz “yumshoq kuch” modelini tahlil qilishga bo‘lgan yondashuvning o‘ziga xosligini alohida qayd etdilar. Muhokama jarayonida, shuningdek, terminologiyani aniqlashtirish, empirik bazani kengaytirish va dissertatsiyaning keyingi himoyasidan oldin uning tahliliy qismini kuchaytirish bo‘yicha tavsiyalar ham berildi.