Joriy yilning 28-iyun kuni Istiqbolli xalqaro tadqiqotlar instituti (IXTI) ekspertlarining Yevropa Ittifoqining O‘zbekistondagi delegatsiyasi (YI Delegatsiyasi) vakillari bilan uchrashuvi bo‘lib o‘tdi. IXTI tomonidan direktor o‘rinbosari Shaxboz Axmedov, Yevropa tadqiqotlari markazi rahbari Durbek Amanov va ilmiy xodimi Mushtariy Usmonova, Yevropa Ittifoqi delegatsiyasi tomonidan esa Siyosat, matbuot va axborot bo‘limi rahbari Mindaugas Kacherauskis va Hamkorlik bo‘limi rahbari Vim Ripma ishtirok etdilar.
Tomonlar Yevropa Ittifoqi Delegatsiyasi va Jahon iqtisodiyoti va diplomatiya universiteti o‘rtasida O‘zbekiston va Yevropa Ittifoqi mamlakatlari o‘rtasida ilmiy hamkorlikni mustahkamlashga qaratilgan uzoq yillik aloqalarni ta’kidladilar. IXTI ekspertlari institut faoliyati va yutuqlari, jumladan, Suv diplomatiyasi markazi va JST tadqiqotlari markazi kabi yangi tematik markazlarni tashkil etish bo‘yicha ma’lumotlarni taqdim etdilar. Ular muntazam ravishda xalqaro konferensiyalar, davra suhbatlari va seminarlar tashkil etish, shuningdek, Yevropa Ittifoqining Markaziy Osiyo davlatlari va Afg‘oniston bilan munosabatlariga bag‘ishlangan har chorakda qo‘shma nashrlar va ma’ruzalar chop etish taklifini ilgari surdi.
Yevropalik hamkorlar takliflarni ijobiy qabul qilib, Delegatsiya faoliyati Yevropa Ittifoqining O‘zbekistonda 2021-2027-yillarga mo‘ljallangan Ko‘p yillik indikativ dasturi, shuningdek, Yevropa Ittifoqining Markaziy Osiyodagi strategiyasiga (2019) asoslanganligini ta’kidladilar. Ular Yevropa Ittifoqining global geosiyosiy o‘zgarishlarni hisobga olgan holda Markaziy Osiyo davlatlari bilan munosabatlarni o‘rnatishga doir strategik yondashuvlarini ko‘rib chiqish va yangilash muhimligini ta’kidladilar, shuningdek, O‘zbekistonning JSTga a’zo bo‘lish jarayonini yakunlash bo‘yicha sa’y-harakatlarini qo‘llab-quvvatlashga tayyor ekanliklarini bildirdilar.
2024-yil noyabr oyida O‘zbekiston va Yevropa Ittifoqi hamkorligining 30 yilligiga bag‘ishlangan xalqaro ilmiy konferensiya o‘tkazish to‘g‘risidagi kelishuv uchrashuvning muhim yakuni bo‘ldi. Tadbir mahalliy va xalqaro tadqiqotchilar, shuningdek, boshqa manfaatdor tomonlar o‘rtasida bilim va tajriba almashish, O‘zbekiston va Yevropa Ittifoqi o‘rtasidagi ilmiy va madaniy aloqalarni yanada mustahkamlash uchun platformaga aylanishi kutilmoqda.
Shunday qilib, uchrashuv O‘zbekiston va Yevropa Ittifoqi mamlakatlari o‘rtasidagi ilmiy hamkorlikni mustahkamlashda muhim qadam bo‘ldi. Tomonlar faol hamkorlik qilishga va turli sohalardagi hamkorlikning dolzarb masalalari va istiqbollarini o‘rganishga qaratilgan yangi loyihalarni ishlab chiqishga tayyor ekanliklarini bildirdilar.
