1-mart kuni Jahon iqtisodiyoti va diplomatiya universitetida “Barqaror rivojlanishga o‘tish: zamonaviy dunyoda atrof-muhitni muhofaza qilish va “yashil” iqtisodiyotni rivojlantirish” mavzusida ilmiy-amaliy davra suhbati bo‘lib o‘tdi. Tadbirda yosh olimlar, tadqiqotchi talabalar hamda ekologik barqarorlik va iqtisodiy rivojlanish masalalariga qiziquvchi mutaxassislar ishtirok etdilar. Davra suhbati JIDU Talabalar ilmiy jamiyati va Eko-klubi tomonidan tashkil etildi.

Tadbirni JIDU yoshlar bilan ishlash va ma’naviy-ma’rifiy ishlar bo‘yicha birinchi prorektori Odil Yusupjanov, Xalqaro iqtisodiyot va menejment fakulteti dekani Mirzoumid Xamdamov, Talabalar ilmiy jamiyati raisi Komronbek Alisherov va Eko-klub koordinatori Shaxruz Gulmetov kirish so‘zlari bilan ochdilar.

Ma’ruzachilardan biri IXTI Barqaror rivojlanish markazi yetakchi ilmiy xodimi Odilbek Manabov edi. U “Suv va energiya Markaziy Osiyoda kelajak barqarorligi va xavfsizligining asosi sifatida” nomli mavzusidagi ma’ruzasida bir qator muhim jihatlarga e’tibor qaratdi:

• Qirg‘izistondan tashqari, Markaziy Osiyoning barcha mamlakatlari u yoki bu darajada transchegaraviy suv resurslariga bog‘liqdir.
• Tojikistondagi Rog‘un GESi, Qirg‘izistondagi Qambarota suv omborlari va Norin daryosidagi kaskadlar kabi yirik gidroenergetika loyihalari mintaqaning gidrologik muvozanatini sezilarli darajada o‘zgartirishi mumkin.
• Mavjud chegaralarga qaramay, suv resurslari mintaqa mamlakatlarining taqdirini birlashtiradi va suv xavfsizligini ta’minlash jamoaviy harakatlar, mintaqaviy hamkorlik va integratsiyalashgan boshqaruvni talab qiladi.
• Elektr energiyasi tobora ko‘proq tovar sifatida emas, balki asosiy huquq sifatida qabul qilinmoqda va uning qiymati iqtisodiy emas, balki ijtimoiy masalaga aylanib bormoqda.
• Suv-energetika resurslarini boshqarishga kompleks yondashuv mintaqada barqarorlik va izchillikni ta’minlashda muhim rol o‘ynaydi, bu esa ham ekologik, ham geosiyosiy vaziyatga ta’sir ko‘rsatadi.

Davra suhbati ishtirokchilarga ilmiy tajriba almashish, "yashil" iqtisodiyot va atrof-muhitni muhofaza qilish sohasidagi dolzarb muammolarni muhokama qilish imkonini berdi. Muhokama doirasida qimmatli ekspertlik fikr-mulohazalari va takliflari bildirildi. Tadbir yakunida ilmiy tezislar to‘plamini nashr etish rejalashtirilmoqda.