Nargiza Umarovaning Caspian Policy Center uchun tayyorlagan tahliliy maqolasida O‘zbekistonning Markaziy Osiyoda transport infratuzilmasi va transport aloqalarining yangi manzarasini shakllantirishdagi asosiy harakatlantiruvchi kuchlardan biriga aylanib borayotgani ko‘rib chiqiladi. Unda Kaspiy dengizi orqali yuk tashishni kengaytirish hamda Turkmanistonning temir yo‘l va port infratuzilmasidan strategik foydalanishni kuchaytirishga alohida e’tibor qaratilgan bo‘lib, rasmiy Toshkentning “Sharq-G‘arb” tranzitidagi rolini izchil mustahkamlab borayotgani ko‘rsatib o‘tilgan.
Maqolada so‘nggi infratuzilmaviy va institutsional o‘zgarishlarning amaliy ahamiyati, jumladan, “Xitoy-Qirg‘iziston-O‘zbekiston” temir yo‘li, CASCA+ yo‘lagini rivojlantirish hamda mintaqadagi temiryo‘l idoralarini muvofiqlashtirishning yangi mexanizmlari bayon etilgan. Ushbu tashabbuslar tufayli O‘zbekiston nafaqat o‘zining tashqi savdo yo‘nalishlarini diversifikatsiya qilmoqda, balki yanada barqaror va o‘zaro bog‘langan mintaqaviy transport arxitekturasini shakllantirishga ham hissa qo‘shmoqda.
Tahliliy sharhda, shuningdek, ushbu jarayonlar kengroq geosiyosiy va iqtisodiy nuqtai nazardan ko‘rib chiqiladi. Unda O‘zbekistonning transport siyosati mintaqaviy integratsiya, Yevropa va jahon bozorlariga chiqish, shuningdek, geosiyosiy beqarorlik sharoitida muqobil yo‘llarni izlash bilan qanday bog‘liqligi ko‘rsatilgan. Qirg‘iziston, Tojikiston, Turkmaniston, Janubiy Kavkaz mamlakatlari va Turkiya bilan hamkorlikning ahamiyati ortib borayotganiga hamda Markaziy Osiyoning kelajakdagi tashqi savdosi uchun “O‘rta yo‘lak”ning strategik ahamiyatiga alohida e’tibor qaratilmoqda.
Yangi logistika zanjirlari bilan bog‘liq imkoniyatlar va cheklovlarni tahlil qilar ekan, sharhda O‘zbekiston transport yo‘laklari geosiyosatida yangi reallikni shakllantirishga hissa qo‘shayotgani ta’kidlanadi. Bu shunday reallikki, unda Markaziy Osiyo davlatlari chekka tranzit hududlar bo‘lib qolmasdan, mintaqaviy va transkontinental bog‘liqlikning yanada faol ishtirokchilariga aylanmoqda.
Caspian Policy Center veb-saytida o‘qing
