Nargiza Umarova va Hayotjon Ibragimov “CBC Ozarbayjon” telekanaliga qo‘shma intervyu berib, unda O‘zbekiston va Ozarbayjon o‘rtasidagi jadal rivojlanayotgan hamkorlik haqida batafsil to‘xtaldilar. Ekspertlar ikki mamlakat munosabatlari strategik sheriklik darajasiga ishonch bilan ko‘tarilganini ta’kidlab, bunga transport va logistikadan tortib energetika va madaniy-gumanitar aloqalargacha bo‘lgan turli sohalardagi hamkorlikning faollashuvi dalil ekanligini aytdilar.

 

Umarova Zangezur yo‘lagini ishga tushirishning amaliy natijalarini sharhlayotib, o‘tkazilgan hisob-kitoblar shuni ko‘rsatganini ta’kidladi: bu yo‘nalish transport masofasini 300 kilometrdan ko‘proqqa qisqartirish imkonini beradi. Bu esa, o‘z navbatida, yuklarni yetkazib berish vaqtini qisqartirish va biznes uchun moliyaviy xarajatlarni kamaytirish demakdir. Aynan yuk tashish muddatlarini qisqartirish va arzonlashtirish O‘zbekiston transport strategiyasining asosiy ustuvor yo‘nalishlari hisoblanadi. Shu nuqtai nazardan, Ozarbayjon bilan hamkorlik mamlakatning geoiqtisodiy manfaatlarini ro‘yobga chiqarish va Yevrosiyo bog‘liqligidagi rolini mustahkamlashning muhim elementi sifatida qaralmoqda.

 

Intervyuning energetika qismida Hayotjon Ibragimov O‘zbekiston, Ozarbayjon va Qozog‘iston o‘rtasidagi yashil energetika sohasidagi hamkorlikning strategik ahamiyatiga to‘xtalib o‘tdi. U 2024-yilda uch davlat energetika tizimlarini integratsiyalash va qayta tiklanadigan energiya manbalarini rivojlantirish bo‘yicha strategik kelishuvni imzolaganini eslatdi. Shu kelishuv doirasida O‘zbekiston va Qozog‘istonda qayta tiklanadigan energiya manbalari hisobiga yashil energiyani birgalikda ishlab chiqarish, keyinchalik uni Ozarbayjon orqali tashish va Yevropa Ittifoqiga eksport qilish bo‘yicha uch tomonlama memorandum imzolangani aytildi. Ibragimovning so‘zlariga ko‘ra, dastlabki iqtisodiy hisob-kitoblar ushbu "yashil yo‘lak"ning istiqboli porloq ekanligini ko‘rsatmoqda, uchinchi davlatlarning o‘sib borayotgan qiziqishi esa bu yo‘nalishning dolzarbligini tasdiqlaydi.

 

Suhbat yakunida IXTI ekspertlari iqtisodiy va energetika hamkorligi investitsiyaviy va gumanitar aloqalar bilan boyib borayotganiga e’tibor qaratdilar. O‘zbekiston Ozarbayjon iqtisodiyotiga allaqachon 21 million dollardan ortiq sarmoya kiritgan bo‘lsa, Ozarbayjonning O‘zbekistonga kiritgan sarmoyasi 183 million dollardan oshgan. Ozarbayjonda O‘zbekiston kapitali ishtirokida sanoat, qishloq xo‘jaligi, qurilish, transport va xizmat ko‘rsatish sohalarida 120 ga yaqin tijorat tashkiloti muvaffaqiyatli faoliyat yuritmoqda. Bularning barchasi, ekspertlarning fikricha, ikki mamlakatni yanada yaqinlashtirish va Ozarbayjon-O‘zbekiston sherikligini mintaqaviy hamkorlik tuzilmasining asosiy tayanch unsurlaridan biriga aylantirish uchun mustahkam poydevor yaratadi.

 

* Istiqbolli xalqaro tadqiqotlar instituti (IXTI) hech qanday masalada muassasaviy nuqtai nazarni bildirmaydi; bu yerda keltirilgan fikrlar faqatgina muallif yoki mualliflarga tegishli bo‘lib, ular IXTIning qarashlarini aks ettirmaydi.