Hulkar Karimova xalqaro savdo, qishloq xo‘jaligi iqtisodiyoti va iqtisodiy siyosat sohasida ixtisoslashgan tadqiqotchi va pedagog hisoblanadi. U Jahon iqtisodiyoti va diplomatiya universitetining Xalqaro iqtisodiyot kafedrasi dotsenti vazifasini bajarmoqda. Karimova Toshkentdagi Xalqaro Westminster universitetining bakalavr va Jahon iqtisodiyoti va diplomatiya universitetining Jahon iqtisodiyoti yo‘nalishi bo‘yicha magistr darajasiga ega. 2023-yilda iqtisodiyot fanlari doktori ilmiy unvonini olgan. 2017-yildan beri JIDUda faoliyat yuritib, mikroiqtisodiyot, jahon iqtisodiyoti va akademik yozuv bo‘yicha ma’ruzalar o‘qiydi. Shuningdek, Karimova Yevropa Ittifoqi va JSTning turli loyihalarida tadqiqotchi sifatida ishtirok etgan.

Uning ilmiy faoliyati O‘zbekistonning savdo siyosati va qishloq xo‘jaligida eksportni diversifikatsiya qilish masalalariga qaratilgan. U 20 dan ortiq ilmiy maqola, bir monografiya muallifi hamda xalqaro loyihalar va konferensiyalar ishtirokchisidir. Bundan tashqari, Karimova Yevropa Ittifoqi tomonidan moliyalashtirilgan dasturlar va ijtimoiy tadqiqotlarda tahlilchi va loyiha mutaxassisi sifatida faoliyat yuritgan.

U O‘zbekiston, Yevropa va AQShda ta’lim olgan va amaliyot o‘tagan, ko‘plab xalqaro stipendiyalar va ilmiy grantlar sohibi bo‘lgan. Karimova Xalqaro savdo instituti (Bern, Shveytsariya, 2022), Missuri universiteti (AQSh, Missuri, 2024) va Ibn Xaldun universiteti (Istanbul, Turkiya, 2025)da malaka oshirish kurslarini muvaffaqiyatli tamomlagan.